Yesuea ado besula sähalea, Dolö afädëa sagaido hawa sadia gogola aliligi asila säi
4
1 Yesuea oeabo edefademalä dibe amo agesugi nea ado mala bu säla olelesa nelo. Udia dolö yafie mafulahilä e neebea amo negegisebegi, e dudaia fila fedai. Du amo ödädaia dilo. Udia dolö yafie gedoi amolida oeabo agesua nefolalo. 
2 Yesuea ilima ado besula mala yafie olelela sähalea, 3 Nabualo. Dolö afädëa helebe guläia gadoi ëi widi gägä sagaido sadia gogola aliligi asimelë.
5 Gägä odoa igidaia naga abelëi dibea ami daala negeimelë. Gägä amo naga abelëi amogi fodolofalï bäui.
6 Fodolofalï bäui gaso, eso neela hëgïsalea difi moholö amo asusugala ödölola bausoimelë. 7 Amase, gägä odoa naga giisi äyo gägäi damula sadia gai bäusebea ami digai. Amoda äyo gägäi giisi amobalä gegedola bäusalea widi gägä amo yau hahalea gägä made negeimelë.
8 Gägä odoa naga hedabi dibea ami daala negei ameada hedabola bäulahilä gägä negeimelë. Odoaeada gägä nabülasi ohodoa negei. Odoaeada nabülasi gafeia negei. Odoaeada nabülasi emu nabülasi negeimelëla säi.
Ado besula sämolö mi dibe beala säi
(Madiu 13.10-17, Ulugu 8.9-10)
10 Yesuea ado säsebe amo nabi amoli odoala ïe bëgëla aulo giwilasi amolibalä Yesu e hïdo neebea awälahilä ea ado besula säi amoïe mi ilia ema nabi.
11 Amala nabasebegi, Yesuea ilima säla obëgësalea, Godea Beaha Maadela Sigi Neebe amo helësëmolö amoda dafidi ulufadigila made musügä negesi dilo amo dilia helësëmäia säla ï amomelë. Udia dolö segea neebe amoma ado besulamu säla ïaha neawe. 12 Amoïe mida gowe.
Ilia siia beahamu namolöi nea gaso, dofä gowe gabula made beagolemolömelë. Ilia gëhea nabahamu nea gaso, asigia helësëmolö mademelë. Ilia beagolela helësësa galebeda ili asigi besusa maadesegi ilile nafade hamoi amo Godea hëla fisisa maadelabiola
säla ï. Aisaea 6.9,10
Ado besula säi amoïe bu awala säi
(Madiu 13.18-23, Ulugu 8.11-15)
13 Yesuea ilima sähalea, Ado besula säi amo fädäla made helësëi neale. Fädäla made helësëi nea galëda, amai sulubadela ado besulamu säsebeweda abilia helësëmolö gabu.
14 Dolö amea molö gägä sadia gogoi amo gadolada ado mala sadia gogoladigisa nea. 15 Ado mala idiafa digai amo gadoida udia dolö odoaea ado mala nabasebegi, ilile isogi ado mala sagasi amo mugabe Saidania fodolofalï maala neadigisa neamelë. 16 Amase, udia dolö odoa widi gägä igi naga abelëidaia digai amo gadoi neebe ameada ado mala obeägïla nabalahilä neala gaulomelë. 17 Amai gaso, ili difi made awäla sedade made aligilomelë. Ilia ado mala neala gaui amoïe yöi beasege, amase, odoaea ili neala sëlasisege, ilia fodolofalï dïgïla aulomelë. 18 Udia dolö odoada giisi äyo gägäi damula sadia gai fedaha dibea daala negei amo gadoi neebe amoliada ado mala nabalahilä gaso, 19 nagadaia galu dibe amogi gumusula helësëlahilä, muni edefade negemolöila, gesami edefade awäla helësëse amea ado mala nabi amo dedelela yau hahalea gägä negelo made neamelë. 20 Amaimo, udia dolö odoa molö gägä naga hedabia daala negei amo gadoi neebe ameada ado mala nabala asigi afädë negelahilä ilia gägä nabülasi ohodoa negeladigi, nabülasi gafeia negeladigi, nabülasi emu nabülasi negeladigilo neamelëla säi.
Gamaliïe ado
(Ulugu 8.16-18)
21 Amalahilä Yesuea ilima nabahalea, Afädëa gamali yola sagai amo faloea dabelole ma, imidi hawa negelole. Gamali waseda, aulidaia negelo madele.
22 Nelebo sulubadela musügä negei dibe amo hobeala ulufadigisa maadela, nelebo sulubadela dabela negei dibe amo yo digai dibea ami neala ulufadigisa maademolöïe amaimelë. 23 Afädëa gëhea nabulöi galëda, nabulö dialeala säi.
24 Ea säi amo säla uda negela made ilima sähalea, Mala nabasebegoda hedabolafalï helësëmalo. Dilia odoagali mogela ïaseda, Godea amo gadola diligali mogela ïahalea odoage baala ïmolömelë.
25 Afädëa nelebo afädë gaula neebe amomada Godea odoa baala ïmolömelë. Amase, afädëa nelebo afädë made gaula neebe amomada, holöfalïmelë gaula neebe amoda haila nimolömelëla säi.
Ado besula sähalea gägä bäulo malala säi
26 Yesuea ado säi amo uda negela made sähalea, Godea Beaha Maadela Sigi Neebea ami gowe gadoi dialea. Dolö afädëa hawa sagaia diigisilahilä
27 gasigi diala yose nowela afu mafusa neë gaalu, gägä sagai amo duulu beselagalala gomalä bäusebela fädäla melëlo made.
28 Nagaeamu neala bäulasilahilä gägä negelomelë. Dafidida bäudale bobagilomelë. Hobeala mumusu negelomelë. Hobeafalï gägä hodo negelomelë. 29 Molö hodo amo nimolö segeyo beselagalai galëda, dolö amo hï helebea damula nelomelëla säla ï.
Ado besula masada gägäïe säi
(Madiu 13.31-32,34, Ulugu 13.18-19)
30 Yesuea sähamu neamu sähalea, Godea Beaha Maadela Sigi Neebea amo abodo gadoila sämolödu. Ado besula abodoma dofe sämolödu. 31 Amoda masada gägä gadoi. Gägä odoa gadoi made. Gägä amoda holöfalïfalï. Amo ilia sagaia sagalomelë.
32 Ilia sagalahilä neëgida fedala edefademaläde aligilahilä dägöala hawa hëhela odoa sagai dibe amo baagila awäla bäulo neamelë. Ïe adomo edefade bafui amogi haea mafula bäu augi hawa ami mosö olelomelëla säi.
33 Yesuea udia dolö amolima ado mala säla ïahaleada ilia helësëla hamosege hamomäia ado besula yafie säla ïaha nelo. 34 Ea mala sähalea ado besulamu säla olelesa nelo. Ïe bëgëla aulo nelo amoli hilidomu neada ea ado besula säla ïaha nelo amoïe mi sulubadela säla ïaha maadei.
Yesuea fo ödälebalä adoi
(Madiu 8.23-27, Ulugu 8.22-25)
35 Segeyo amo galamu deadi eso digase gaalu, Yesuea ïe bëgëla aulo amolima sähalea, Oeabo edefademalä go dëgëla nali alogodigogi afiadila säi.
36 Amala sälahilä udia dolö yafie nefolalo amoli amilahilä ili Yesu sulo du amodaia fila fedai. Eege hiligila fila afiai. Du odoage ili awäse amo gadola asi.
37 Awäha nebegi, fo edefade gelola guula maalahilä oeabo bubolela aidagula dudaia häila digai. Ödä häila digalahilä du nobagëdäi.
38 Amala hamomolö amo gaalu, Yesu e ödä du bidigi busa fugulo negela adi dilo. Amala dibegi ilia e didiigisalea ema sähalea, Säla Olelelo, di nowemo. Nilï baagodelä hamosebe gowegi di holöfalï fudugila made dialealela nabi.
39 Amala säsebegi, Yesu e nowela nea foma nemolahilä ödäma sähalea, Aeala aumamo. Fologomabula säi. Amala sälebe fo gelola misi amo bogelela fisila ödä aidagula fedai amoge aumalasi.
40 Ea ilima nabahalea, Edogi bedäha dialea. Dili Godema asigi afädë negei made nealela nabi. 41 Amala usila aumase amo bealahilä ili edefademalä bedälahilä hilidomu sähalea, Folea ödäleada ïe ado nabelo gabu. Dolöwe nowëdula säha sefolalo.
