2 Du leso Sabat, Hia pu’ung toing oné mbaru ngaji agu lawa do nitu lenget taungs du dengé toing Diha agu mai taéd: “Nia maid kéta Diha sanggéd apa situ? Nggalas apa kéta kolé situt téing oné Hias? Agu sanggéd tanda lenget situ, co’os Liha pandéd?

3 Toé weli Hia ata tukang hajuy, anak di Maria, asé-ka’én hi Yakobus, hi Yosés, hi Yudas agu hi Simon? Agu toé weli weta Diha manga cama-cama agu ites?” Itug kali majan lisé agu doét Hias.

4 Og kali mai taé de Mori Yésus ngong isé: “Cengata nabi hiang lata nia-nia kaut wan, maik toé oné béo run, oné bahi-réha haé kilon agu oné mbarun.”

5 Hia toé manga pandé can koé tanda lenget nitu, bo pandé ina pisa taus ata beti le témba limé Diha bétan isé.

6 Hia lenget koléy ali toé imbi disé.(6-6b) Itu kali Mori Yésus lako léok béoy cang agu toing atan.

7 Hia bénta isét campulusua rasul situ agu wuat isé sua-suas. Hia téing isé kuasa te mbér sangged jing da’at,

8 agu pedé oné isé kudut néka ba apa-apa oné salang, bo dongkar, roti kolé néka, bokong kolé néka,

9 ngancéng paké sendal, landing néka paké suan baju.

10 Mai kolé taé Diha ngong isé: “Émé oné ca osang méu poli tibas oné ca mbaru, ka’éng nitum dengkir méu kolé oné mai mbaru hitus.

11 Agu émé manga ca osang ata toé tiba méu agu émé isé toé ngoéngd te séngét méus, kolé nitu mais agu péntang kaut kebok situ wa wa’is latang te langi agu isé.”

12 Og kali ngod isé te ba keréba kudut sanggén ata tesérs

13 agu isé mbér do jing da’at agu doés do kolé ata beti le mina agu pandé ina isé.

14 Hi raja Hérodés kolé dengé taung tombo ngasang de Mori Yésus ai pecing taung lata ngasang Diha agu mai taé data: “Hi Yohanés Cebong poli to’o kolé oné mai ata matan agu itu tara mangan do kéta kuasa oné hia.”

15 Ata iwod nggo’o taéd: “Hia hitu hi Elia!” Ata iwon kolé nggo’o taéd: “Hia hitu cengata nabi cama ného isét nabi-nabi médé.”

16 Du dengén li Hérodés tombo hitu, mai taén: “Toé ta, hia hitu hi Yohanés hiot poli kepu bokakn laku agu to’o koléy.”

17 Ali weki run muing hi Hérodés, jera ata kudut deko hi Yohanés agu pengkut hia oné bui landing manga raja di Hérodias, wina de asé-ka’én hi Pelipus, ai hi Hérodés poli roko hian te ciri winan.

18 Ai hi Yohanés poli dé’it renti hi Hérodésn: “Toé kéta kopn hau emi wina de asé-ka’ém!”

19 Ali hitu hi Hérodias rangkat kétay agu hi Yohanés agu mek kin te ala hia, maik toé ngancéng,

20 ai hi Hérodés, sengang kolé agu hi Yohanés, ai pecing liha te hi Yohanés cengata ata molor agu nggeluk, wiga kémbén liha. Maik émé séngét liha toing di Yohanés, mbu-mbek kin nain, maik lélak kin te séngét hia.

21 Cemoln ga cain sokor di’a latang te hi Hérodias du hi Hérodés pandé ramé leso dadingn latang te gatang pegawé-pegawé mésé agu kepala tentera agu sanggéd ata tu’a oné tana Galiléa.

22 Du hitu anak molas di Hérodias ngo oné sa’éy, agu hia pandé nisang nai di Hérodés agu sanggéd mekan.

23 Mai taé de raja ngong ata molas hitu: “Apa kaut ata tegi de hau, téing kauts laku, koném waga cecupun tana ho’ot perénta daku!”

24 Anak hitu ngo réi oné endén: “Apa ata di’an tegi daku?” Mai walé de endén: “Tegi ulu di Yohanés Cebong!”

25 Itug kali gélang-gélangn hia ngo nggere-oné raja agu tegin: “Ngoéng daku, paka ho’o muing lité téing oné akun ulu di Yohanés Cebong lobo kepar.”

26 Itu kali wéong kéta nain raja, maik landing poli wadan agu ali sanggéd mekan, hia toé gorin te doét.

27 Raja gélang-gélang jera cengata pegawén agu perénta kudut emi ulu di Yohanés. Ata hitu ngoy agu poka bokak di Yohanés oné bui.

28 Hia ba ulu hitu oné kepar agu téing oné anak molas hitu agu anak molas hitu téing agu endén.

29 Du dengén alan hi Yohanés le ata nungkun, mais isé téti rapun, agu boaky lisé.

30 Poli hitu sanggéd rasul kolés, impung agu Mori Yésus agu tombo oné Hia sanggéd ata poli gori agu toing disé.

31 Itu kali mai taé Diha ngong isé: “Mai ga, ngo oné osang ata lingotn, kudut hanang koéd, agu asi cekoén!” Ai do bail ata haluk pé’ang oné, wiga latang te lompong kaut toé manga lingad.

32 Os ngod isé te hedong, léti wangka nggere-oné osang ata lingotn.

33 Maik du ngod isé, do kéta ata ita isé agu pecing nggere-nias ngod. Wajo kaut lako loléng sanos, rodo tuad maid ata do oné mai sanggéd béndar nggere-oné osang hitu wiga cai olos.

34 Du wa’un Mori Yésus ita Liha nunggu-nengger kéta lawa do, itug kali wéong kéta nain ali momang isé, ai isé cama ného jimbal siot toé manga ata lamid. Itug kali pu’ungn Hia toing do kéta oné isé.

35 Du manén tana ga, mais ata nungku nggere-oné Hia agu mai taéd: “Osang ho’o lingot kétay agu manég tana.

36 Co’om jera kolés ga, kudut isé ngancéng weli hang oné béo-béo agu mukang ata ruis cé’é ho’o.”

37 Maik mai walé Diha: “Méu paka téing hang ata do so’o!” Mai kolé taé disé agu Hia: “Ma’ut, lami kétas tau weli roti ata améng sua ratus dinar te cakong isé?”

38 Maik mai taé Diha ngong isé: “Pisa mongkod roti ata manga oné méu? Damangs di lélod!” Poli nggo’o lélod lisé, mai taéd: “Lima mongkod roti agu suad ikang.”

39 Og kali jeras Liha lawa do situ kudut lonto néténg liups lobo remang lebo.

40 Agu du poli emid Liha lima mongkod roti agu suad ikang situ,

41 Hia conga nggere-éta awangy agu wan berkak, itu kali pu’il sanggéd roti situ agu téings Liha oné ata nungkun, kudut pati oné lawa do situ; nenggitu kolé ikang situt sua mongkod, pati kéta taung oné sanggéd lawa do situ.

42 Agu sanggéd isé hang wiga becur kéta taungs.

43 Poli hitu ligots lisé ropo roti situt récid campulusua rotod, toé bilang nitus ikang ata récid.

44 Ata hangd roti situ manga lima sebud ata rona.

45 Poli hitu Mori Yésus jera muings Liha ata nungkun paka léti wangka agu ngo olos nggere-sina Bétsaida, lari nggitun Hia jera lawa do situ kolé taung.

46 Woko poli bécang Hia agu isén, Hia ngo nggere-éta goloy te ngaji.

47 Du wiég tana, wangka hitu manga oné bahi-réha sanoy, maik Mori Yésus ka’éng hanang koén pé’ang tana masa.

48 Du itas Liha hempe-hut kétas bisé wangkad wajo le pamper buru olo mai, niat ongga telu le wié, Hia mai oné isé, lako lobo waéy agu Hia kudut lagé iséy.

49 Du itan lisé Hia lako lobo waéy, bet disé poti, wiga isé ciék da’ats,

50 ai sanggéd isé ita kéta taung Hia, agu isé rantang taungs. Maik gélang-gélang mai taé Diha ngong isé: “Néka simpung! Aku ho’o, néka rantang!”

51 Og kali Hia ngo nggere-oné wangka, cumang agu isé, agu lik kolég buru. Isé lenget kétas agu bules taung nukd,

52 koném po poli mantén lisé tanda lenget roti hitu, toé kin nipu lisé, agu nai disé ngegil kid.

53 Du caid besina, Mori Yésus agu ata nungkun wa’u oné Génésaréts agu asi nitus.

54 Du pé’angd oné mai wangka, gélang kéta pecingn lata Mori Yésus.

55 Itu kali mburuk kétas isé nggere-oné temu tana hitu agu pu’ung muing berotongd sangged ata beti nggere-oné Mori Yésus, nia kaut wan mangan Hia.

56 Nia kaut liba Diha, oné sangged béo, oné sanggéd béndar ko oné sanggéd mukang peher lata sanggéd ata beti oné amba, agu tegi oné Hia, kudut isé sendo koés am tamat te cabi lindi juba Diha. Agu sanggéd ata situt cabi Hia ina kéta taungs.