Mori Yésus Téing Hang Pat Sebu Ata
8
1 Du hitu manga kolé ata lawa do kéta nitu, agu ali isé toé manga hangd, Mori Yésus bénta ata nungkun agu mai taén:
2 “Mohas kéta nai Daku ita ata do so’o. Telu lesog musi main isé lut Akus, agu isé toég manga bokongd.
3 Agu émé jera kolé mbaru isé Laku déméng daremd, aram te boats oné salang, ai manga ata mai déu maid.”
4 Mai walé data nungku Diha: “Co’o kéta téi hangd ata do so’o wiga becurd oné osang ho’ot lingi-lengot?”
5 Mori Yésus réi agu isé: “Pisa mongkot roti de méu?” Mai walé disé: “Pitud.”
6 Itu kali Hia jera ata do situ lonto wa tanas. Poli hitu Hia emi roti pitu mongko situ, ngaji wali di’ay, pu’ils agu téing oné ata nungku Diha latang te patis agu téing lisé oné lawa do.
7 Isé kolé manga pisa mongkod ikang, agu du poli berkakd, jera kolé Liha kudut pati taungs ikang situ.
8 Agu isé hang wiga becurd. Poli hitu ligots lisé roti situt récid pitu rotod.
9 Isé situ am manga pat sebu atas. Og kali jera koléd le Mori Yésus.
10 Hia lampuk tuké nggere-éta wangka agu ata nungkun agu lajar nggere-oné tana Dalmanuta.
Ata Parisi Tegi Tanda
11 Os kali maid ata Parisi agu sina-cé’é kétas curupd agu Mori Yésus. Kudut damang Hia, isé tegi oné mai Hia ca tanda éta mai Surga.
12 Itug kali gesar oné nain Hia agu curup: “Co’o tara tegi tandad ata uwa so’o? Aku taé agu méu, moro matan, latang te ata uwa so’o toé kéta téing tandas.”
13 Hia legong isé nitu; Hia léti kolé wangkay agu ngo besinay.
Latang Te Ragi Data Parisi Agu Ragi di Hérodés
14 Musi main po baé te ata nungku de Mori Yésus hémong te ba rotis, hanang ca kanang ata manga oné isén, oné wangka.
15 Og kali Mori Yésus jér isé, mai taén: “Néka témo agu jerék latang te ragi data Parisi agu ragi di Hérodés.”
16 Ngasang kenanu lisé, agu mai curup cama taud: “Tara nenggitun curup Diha, ai ité toé manga rotid.”
17 Agu du pecing le Mori Yésus apa hitut curup disé cama taud, mai taé Diha: “Co’o tara curup laing le méu toé manga roti? Toé tara ita oné nais ko? Ko ata tingul méu?
18 Méu manga matas, toé ita le méu, agu méu manga tilus, toé kin dengé le méu ko? Toé nuk kolé le méu,
19 du pu’ild Laku lima mongkod roti latang te lima sebu ata du hitu, pisa rotod penong ata récid?” Mai walé disé: “Campulu sua rotod.”
20 Réi kolé le Mori Yésus: “Agu du pitu mongkod roti te cakong pat sebu ata du hitu, pisa rotod ligot le méu situt récid?” Mai walé disé: “Pitu rotod.”
21 Og kali mai taé Diha ngong isé: “Toé kéta tara tingo le méu oné nais?”
Mori Yésus Pandé Ina Cengata Ata Beti Oné Bétsaida
22 Poli hitu cai Mori Yésus agu ata nungkun oné Bétsaida. Nitu dadé lata nggere-oné Mori Yésus cengata ata buta kudut cadi koé Liha.
23 Mori Yésus cau limé data buta hitu agu dadé hia pé’ang mai béo. Og kali Hia iso mata data hitu agu témba limén lobo ata hitu agu réi Liha: “Poli itad le hau cao-ca?”
24 Ata hitu lélo nggere-oloy, mai taén: “Aku ita atak, ai ita isé lari lakod, maik itad ného pu’u hajus.”
25 Mori Yésus entep kolé limén oné mata data hitu, itu kali ata hitu ita tu’ung kétay agu poli inan, wiga hia ngancéng ita si’ang kétas sanggén cao-ca.
26 Poli hitu Mori Yésus jera hia kolé mbarun agu pedén: “Asi di kolé béom!”
Tura Di Pétrus
27 Poli hitu Mori Yésus agu ata nungkun ngo néténg béos oné tana Kaisaréa Filipi. Rémé lakod, mai réi Diha agu ata nungkun: “Taé data, céik léng Aku ho’o?”
28 Mai walé dise: “Manga ata caro ité: hi Yohanés Cebong, manga kolé ata caro: hi Élia, manga kolé ata caro: cengata oné mai sanggéd nabi.”
29 Hia réi agu isé: “Maik co’o de méun, céik léng Aku ho’o?” Og kali walén li Pétrus: “Ité hi Mésias!”
30 Itu kali Mori Yésus ré’ing tu’ung kétas isé, kudut néka kéta tombo oné céi-céing kaut latang te Hia.
Toi Te Laring Cain Latang Te Susa De Mori Yésus Agu Co’o-co’o Lut Hia
31 Poli hitu pu’ungn Mori Yésus toing isé, te Anak Manusia paka cukung susa doy agu te dungkang le tu’a do, le imam kepala agu le ata pecing Taurat, cemoln te ala latay agu to’o koléy oné leso te telun.
32 Curup ho’o tombo Liha si’ang kétay. Maik hi Pétrus ndol Mori Yésus nggere-pé’ang lupi salang agu rengkes Hiay.
33 Og kali holésn Mori Yésus, cang agu lélo ata nungkun, Hia rabo agu hi Pétrus, mai taé Diha: “Pé’ang hau poti, ai hau toé nuk apa ata nuk de Mori Keraéng, maik apa ata nuk de manusia.”
34 Itu kali Mori Yésus bénta ata do agu ata nungku Diha, mai taén ngong isé: “Céing kaut ata ngoéng lut Aku hia paka pali weki run, pola panggoln agu lut Aku.
35 Ai céing kaut ata ngoéng te mo’eng mosén, hia te mora mosén; maik céing kaut ata mora mosén landing Aku agu Injil, hia te mo’eng mosén.
36 Apa betuan hiat cengata delék sanggéd wéang de lino, maik hia mora mosén?
37 Ai apa ata ngancéng téing liha te paluk mosén?
38 Ai céing kaut ata ritak landing Aku agu landing sanggéd curup Daku, oné bahi-réha uwa weru so’o ata toé junggu agu ndékok so’o, Anak Manusia kolé te ritaky landing ata situ émé Hia mai koléy tai déméng agu néra de Eman cama laing agu sanggéd malékat nggeluk.”